“Умсулҕаннар” 30 сылларын туһунан кэрэ кэпсээн

2024 сыл кулун тутар 16 күнүгэр “Саха” НКИК “Кэрэ кэпсээн” биэриитигэр Уус Алдан коллекционердарын “Умсулҕан” түмсүүлэрин 30 сылыгар аналлаах бэртээхэй бирэии буолан ааста.

Ким көрбөккө хаалбыт, куйаар ситимигэр бу сигэнэн киирэн, хаһан баҕарар атсына-дуоһуйа көрүххүтүн сөп.

“Саха” НКИК аналлаах биэриитигэр Уус Алдан коллекционердарын туһунан биэриини олус сэргээн, астына көрдүм. “Умсулҕаннар” Саха сирин биир саамай кырдьаҕас, ураты тэрээһиннээх, үгүс өрүттээх үлэни ыытар  улуустааҕы түмсүү буоларын бары билэбит, сыаналыыбыт.

Бу мунньар идэлээх дьон сороҕор анал сорук оҥостон, сорохтор олох бэйэлэрэ да билбэттэринэн, дойдубут историятын, норуоппут ааспыт олоҕун сибидиэтилистибэлэрин хомуйан, харыстаан, харайан, сөргүтэн, кэлэр көлүөнэлэргэ тиэрдэргэ олус улахан, тугунан да кэмнэммэт үлэни оҥороллор дии саныыбын.

Коллекционердар бары араас идэлээх да буоллаллар, кинилэр үлэлэрэ, мунньар хомуурдара барыта оҕолорбут, сиэннэрбит уруккуну өйдүүллэригэр, салҕыы көлүөнэттэн көлүөнэҕэ бэриллэригэр олук уураллар. Онон бу мунньар “ыарыыбыт” – норуот педагогикатын биир уһулуччулаах көрүҥэ, олус умсугутуулаах уонна оҕону кэрэхсэтэр, кини сэргээн дьарыктанарыгар биир бастыҥ ньыма.

Маннык түмсүүлэр биирдиилээн коллекционердары сомоҕолоһорго, бииргэ үлэлэһэргэ эрэ көҕүлээбэттэр. Биирдиилээн мунньааччылар сайдалларыгар, кинилэр бэйэлэрин хомуйууларын систиэмэлээн, классификациялаан, ханнык баҕарар таһымнаах быыстапкаҕа, дьиҥнээх уопуттаах мунньааччыларга кыбыстыбакка көрөдөр кыахтаналлар.

Биһиги дойдубутугар 30 сыл устата үгүс араас тэрилтэлэр арыллан, оннооҕор араас политическай партиялар бөҕө тэриллэн баран эстэн, ыһыллан, сүтэн хааллылар. Онтон “Умсулҕан” 30 сылы быһа тигинэччи үдэлээн, быыстапка бөҕөтүн, атын араас тэрээһиннэри ыытан, бэйэлэрин хомуйууларын бар дьонноругар көрдөрөн, эдэр ыччаты бэйэлэрин дьарыктарыгар уһуйан тиийэн кэллилэр. Махтал, бары доҕотторбутугар, көҕүлээччи Станислав Николаевичка, кини чугас доҕотторугар!

Атын улуустар түмсүүлэрэ эмиэ маннык биэриини ыыталлара буоллар диэн баҕа санаабын тиэрдэбин.

Владислав КОРОТОВ.

Поделиться: