«Чэ» студия АВЕ фирманы кытта бу күннэргэ саха аныгы рок-бөлөхтөрүн туһунан биэриини уста сылдьаллар. Анатолий Кириллин-Чээкэ уонна Иван Тарасов-Эрэл Эрилик ыҥыраннар, бэҕэһээ квартирник кэнсиэрдэригэр тиийэ сырыттым. Дьэ онно баар эбит, урукку, 90-00-с сыллардааҕы муусука эйгэтэ – тыыннаах дорҕоон!
Куорат таһынааҕы дьиэҕэ дьиҥнээх видеостудия үлэлиир эбит. Киинэ устарга уопуттаах дьон иккис режиссёр Лена Жиркова салайыытынан үлэлии сылдьаллар, Галя Семенова грим өҥөтүн оҥорор эбит. Үгүс киинэ устуутугар айар талаанынан эрэ буолбакка, илиитигэр дэгиттэр дьоҕурунан биллэр Чээкэ астаабыт минньигэс эбиэтин аһыы-аһыы, үөрүү-көтүү, кэпсэтии-сэһэргэһии. Көрөөччүлэргэ муусука эйгэтигэр киэҥник биллэр дьон бааллар – суруналыыс, ырыаһыт Яна Угарова, режиссер, тэрийээччи Карл Сергучев, биллэр ырыа айааччылар Александр Спиридонов, Николай Андросов, тыас-уус маастара Владимир Спиридонов, киинэ режиссерэ, “Саха” НКИК биэриини ыытааччыта Александр Лукин бааллар.
Манна Бүлүүттэн “Түмэн”, Үөһээ Бүлүүттэн “Үргэл”, “ Ньурбаттан “Амака” уонна Сунтаартан «Хаһыы” бөлөхтөр кэлэн, “Чэ” биэриигэ уһулла сылдьаллар.
Мин биир дойдулаахтарым, аатырбыт “Ай-Тал” бөлөх салайааччыта Юрий Спиридонов-Сиэн Тиитэп салалтатынан тэриллибит “Хаһыы” бөлөх уһуллуутун көрдүм. Бөлөххө Арнольд Ордахов (ритм-гитара), Владимир Константинов (бас-гитара), Нюргун Данилов (клавишнайдар, бэк-вокал), Юрий Иванов (охсор-тэбэр үнүстүрүмүөннэр, бэк-вокал), уонна сүрүн киһилэрэ Анатолий Пахомов (соло-гитара, вокал) киирэллэр.
Бу уолаттар ырыаларын урут биирдиилээн истэрим, онтон бу биэриигэ анаан, олохтон соторутааҕыта букатыннаахтык барбыт саха рок муусукатын төрүттээччи Тумус Мэхээлэ-Михаил Сысоевич Тумусов тылларыгар бөлөх ырыаһыта, соло-гитарист уонна ырыа айааччы Анатолий Пахомов айымньыларын аҕалбыттар. Ырыалара бары араас хабааннаахтар, сороҕор джаз мелодиялара, блюз матыыптара иһиллэллэр. Анатолий гитараҕа оонньууру лаппа баһылаабыта көстөр, ыллыыра да олус үчүгэй. Саха рок ытык дьоно – “Ай-Тал” бөлөҕү төрүттээччи Александр Спиридонов-Кыһыл көмүс саксофон, режиссер Карл Сергучев, ырыаһыт уонна мелодист Николай Андросов “Хаһыы” уолаттарын бэркэ диэн хайҕаатылар, ордук Анатолий оонньуурун, Карл Сергучев кыыс куолаһын эбии киллэрэри сүбэлээтэ.
Владислав КОРОТОВ,
ааптар түһэриитэ.
Элбэх хаартысканы мин телеграм ханаалбар киирэн көрүҥ, суруттарыҥ
“Чэ” биэрии куйаар ситимигэр таҕыстаҕына, сэргээн көрөргүтүгэр ыҥырабын.
Холобур, бу күннэргэ күн сирин көрбүтүн бэлиэтиэхтээх, олус эрдэ олохтон барбыт чаҕылхай ырыаһыт Василий Еремеев туһунан “чэлэр” биэриилэрин бу сигэнэн киирэн көрүҥ: