Спорду сэҥээрээччилэр истибиттэрин курдук, Дьокуускайга мас тардыһыыга Монголия сүүмэрдэммит хамаандата сэтинньи бүтүүтэ Кыргызстан киин куората Бишкек куоракка ыытыллыахтаах ан дойду бэһис чемпионатыгар аналлаах бэлэмнэнини бараары кэлбитэ. Хамаанда састаабыгар улахан дьоҥҥо уонна оҕолорго аан дойду ааттаахтарын кытта киирсэ баран иһэр спортсменнар бааллар. Кинилэр манна икки сэттиэлэ устата саха бастыҥ уһуйааччыларын көмөлөрүнэн бэлэмнэниэхтэрэ, онтон мантан быһа Бишкекка көтүөхтэрэ. Ыалдьыттарбыт “Триумф” спорт уораҕайын гостиницатыгар түһэ сыталлар, онно аһыыллар.
Бүгүн “Модун” спорткомплекска Монголия мадьыныларын уонна Дьокуускай куорат 1 №-дээх ДЮСШ иитиллээччилэрин табаарыстыы көрсүһүүлэрэ олус тыҥааһыннаахтык ааста. Көрсүһүү саҕаланыытыгар ДЮСШ-1 салалтатын аатыттан уһуйааччы, күрэхтэһиини көҕүлээбит Иван Копырин ыалдьыттарбытыгар эҕэрдэ тылларын эттэ, сыаналаах кинигэни туттарда.
Көрсүһүү кэнниттэн Иван Иванович Копырин бэйэтин санаатын үллэһиннэ:
— Бу оҕолортон баҕар ким эмит Дьокуускайга кэлэн олорон, биһиги спорт оскуолабытыгар дьарыктаныан сөп, биһиги ыҥырабыт, үөрүүнү кытта көрсүөхпүт, үөрэтиэхпит. Асанкулов Алмаз диэн уол манна олоро сылдьыбыта, биир сыл дьарыктанан барбыта. Онтон Кыргызстаҥҥа тиийэн, быйыл дойдутун хамаандатыгар сүүмэрдээһини ааһан, аан дойдуга бастыыр иһин күрэхтэһиигэ кыттаары сылдьар.
Онтон бүгүҥҥү киирсии түмүгэ 7-5 буолла, монголлар кыайан, үөрүү-көтүү бөҕө буоллулар, оҕолор барахсаттар. Манна өссө төгүл санатыахпын баҕарабын. Өскөтүн бүгүҥҥү утарылаһааччыларбыт, Монголия мадьынылара дойдуларыгар сүүмэрдээһиини ааспыт национальнай хамаанда чилиэннэрэ буоллахтарына, биһиги оҕолорбут биир оскуола иитиллээччилэрэ, онон олус бэркэ кииристилэр диэн үөрэбин. Сатаатар мин оҕолорбуттан республика чемпионнара Егоров Айсеным уонна Протопопова Дианам киирсибэтилэр.
Монголлар олус сайдыбыттар, күүс өттүнэн лаппа баһыйаллара көстөр, стойканы да лаппа баһылаабыттар, техникаларын арыый туруордахтарына, аан дойдуга кимиэхэ баҕарар таһаҕас буолар кыахтаммыттар. Ол гынан баран, старка иһиттэн-таһыттан хос-хос эрий да эрий буола олороллор эбит, сэрэтии биэриэм диирбин өйдөөбөттөр. Манна эрчиллэн, өссө эбиллэн тиийэн, аан дойдуга мэтээллэнииһиктэр. Кэлэр сэттиэлэҕэ ДЮСШ-1 ыҥырдыбыт. Табаарыстыы көрсүһүүнү тэрийбит “Модун” тренердэригэр махталбытын тиэрдэбит.
Владислав КОРОТОВ,
автор хаартыскаҕа түһэриитэ.