Алтынньы 16 күнүгэр В. Белинскэй аатынан кыраайы үөрэтэр бибилэтиэкэҕэ педагог, суруйааччы, кинигэ таһаарааччы Геннадий Тимофеевич Степановы кытта көрсүһүү буолла. Тэрээһин сүрүн соруга – кинигэ таһаарыытын туһунан кэпсэтии. Сөхпүтүм, балайда элбэх киһи кэлбит, үгүстэрэ аҕам саастаах эдьиийдэр, ыалдьыт кэпсээнин бэркэ сэргээн иһиттилэр.
Геннадий Степанов Дьааҥы улууһуттан төрүттээх, дойдутугар өр кэм устата учууталынан, иитээччинэн, оскуолаҕа кылаас таһынааҕы үлэни тэрийээччинэн, дириэктэринэн үлэлээбит. Бултаах-алтаах, чочумаас хайалардаах, сүүрүктээх үрэхтэрдээх сиргэ олоророр буолан, кини үөрэнээччилэрэ оҕо эрдэхтэриттэн бултуур, балыктыыр дьарыкка умсугуйаллара, сороҕор сааҕа-сэпкэ дэҥнэнэр, араас оһолго түбэһэр, ардыгар мунан да хаала түбэлтэлэрэ тахспалларын иһин, эрдэҕэс уолаттарга булт кистэлэҥнэрин билиһиннэрээри, сэрэхтээх буоларга үөрэтээри, Геннадий Тимофеевич кинигэ суруйарга санаммыт. “Молодому охотнику” диэн ааттаабыт айымньытын улахан бырыһыаҥҥа кредит ылан, онон бэчээттэппит. Соһуйуон иһин, кинигэни дьон сэргээн, хамаҕатын атыыласпыттар. Бастакы үлэтэ табыллан, онтон эрдийэн, ити кинигэтин эбии өссө икки төгүл бэчээттэппит.
1997 сылга куоракка көһөн кэлэн, Геннадий Тимофеевич учууталтан саҕалаан, Ил Түмэн эппиэттээх үлэһитигэр тиийэ үлэлиир. Таптыыр дьарыгын салҕаан, бу кэм устата өссө 10 кинигэни таһаарар. Сааһын үгэнигэр олохто хомолтолоохтук барбыт талааннаах худуоһунньук Иннокентий Пестряков олоҕун, айымньылаахз үлэтин туһунан, 1200 хартыынатын (!!!) киллэрбит бэртээхэй альбому таһаарбыта. Салгыы эмиэ И.Пестряков уруһуйдарын туһанан, история билимин дуоктара Розалия Иннокентьевна Бравина кинигэтин күн сирин көрдөрбүтэ. Биир дьоһуннаах үлэтинэн төрөөбүт Дьааҥытын историятын, былыргытын уонна билиҥҥитин туһунан 630 страницалаах кинигэтинг ааҕар.
Геннадий Тимофеевич мустубут дьоҥҥо айар үлэтин, бэйэтин олоҕун туһунан сиһилии кэпсээтэ. Үгүс ыйытыктарга хоруйдаата.
Мин эмиэ кэпсэтиигэ кыттыһан, кинигэ таһаарыытыгар бэйэм уопуппуттан үллэһинним.
Владислав КОРОТОВ суруйуута,
хаартыскаҕа түһэриитэ.
Хаартыскалары Телеграм ханаалбар суруттаран киирэн, бу сигэнэн көрүҥ, бэйэҕитигэр хачайдаан ылыҥ
https://t.me /VladKorotov54/126166