Ахсынньы 22 күнүгэр СӨ Национальнай бибилэтиэкэтигэр «Айар» кинигэ кыһатын салайааччытын солбуйааччы, биллэр суруйааччы, суруналыыс, тылбаасчыт, уопсастыбанньык Валерий Николаевич Луковцев 65 сааһыгар аналлаах көрсүһүү буолла. Үөрүүлээх тэрээһини Ил Дархан сүбэһитэ Игорь Игнатьевич Николаев салайан ыытта.
Түһэрбит хаартыскаларбын бу сигэнэн киирэн көрүҥ.
https://t.me/VladKorotov54/136272
Саха Кэҥгириэһин аатыттан Иван Шамаев, Зоя Алексеева, Алла Ноговицына буоламмыт, биир санаалаах доҕорбутугар маннык эҕэрдэ суруйдубут.
Ытыктабыллаах Валерий Николаевич!
Үбүлүөйдээх күҥҥүнэн Саха кэнгириэһин аатыттан итии-истиҥ эҕэрдэ тириэрдэбит!
Эйиэхэ, төһө да үбүлүөй диэн буоллар да, айар-тутар сааһыҥ үгэнэ буоллаҕа. Эн олоҕуҥ устатыгар Саха сирин устуоруйатыгар, саха дьонун-сэргэтин өйүгэр-санаатыгар хаалар үгүс үтүөнү, кэрэхсэбилллээҕи оҥорон, айан-тутан кэллиҥ. Саха норуотун култуурата чэчирии сайдарыгар, төрөөбүт тылбыт чөл туруктаах буоларыгар, сахалыы тыллаах литература сайдыытыгар уонна бырааттыы дойдулар дитератураларын кытта алтыһыыга, хардарыта сибээһи олохтооһуҥҥа үтүмэн үлэни оҥороҕун.
Тус бэйэҥ өрөспүүбүлүкэ олоҕор буолбут уонна буола турар суолталаах тэрээһиннэргэ көхтөөхтүк кыттаҕын. “Суруллубут – суоруллубат” диэн саха өс хоһоонун Эн дьиҥ чахчы олоххо киллэрэ сылдьаҕын. Ол курдук, саха олоҕун мөккүөрдээх, киирсиилээх кэмнэрин, ол кэмнэр дьоруойдарын чинчийэн, сурукка тиһэн, бар дьоҥҥор, кэнэҕэски ыччаттарга ураты суолталаах кинигэлэри күн сирин көрдөрдүҥ.
???????????????????????????????????? 
Эн саха уһулуччулаах патриоттара Даланы, Доосону, Тумарчаны, уо. д. а. кытта эдэр сааскыттан бииргэ үлэлээн, төрөөбүт дойду патриота буолуу, норуот туһугар үлэлээһин оскуолатын ааспытыҥ. 90-с сылларга Саха иккис Өрөспүүбүлүкэтэ олохтонор, норуот өйө-санаата уһуктуутугар улахан оруолу оонньообут “Эдэр интеллигенция” түмсүүнү тэрийсибитиҥ, духовнай лиидэрэ буолбутуҥ. Эмиэ ити сылларга үөскээбит “Сайдыс”, “Ил” баартыйа актыыбынай кыттыылааҕа буолбутуҥ. 2002 сыллаахха “Саха общественнай киинин” тэрийсибитиҥ, өр сылларга инники күөҥҥэ сылдьыбытыҥ.
Эн Илья Винокуров аата тиллэригэр уонна үйэтитиллэригэр бэйэҥ тус кылааккын киллэрбитиҥ. Саха государственнай университетыгар Максим Аммосов аата иҥэриллибитин 2009 сыллаахха сотон кэбиһээри гыммыттарыгар, миитин тэрийэн, суруктары суруйан, илии баттааһын хомуйан, Чаҕылхай Махсыыммыт аатын туруулаһан, көмүскээн ылбытыҥ. 2012 сыллаахха “Саха Өрөспүүбүлүкэтин Бэрэсидиэнэ” диэн аат бобуллар түгэнигэр Саха сирин Аҕа баһылыгар “Ил Дархан” диэн ааты иҥэрэри өрөсппүүбүлүкэ уопсастыбаннаһа, норуот дьокутааттара туруорсалларын ситиспитиҥ.
Маны таһынан уруулуу түүр омуктардыын үтүө ситими олохтоон, ол түбүгүҥ Аан дойду түүр омуктарын Ассамблеятын “Күл-Тэгин” мэтээлинэн биһирэммитэ үрдүк сыанабыл буолар.
Валерий Николаевич, Эн сахаҥ норуотун инникитин, биһиги төрөөбүт дойдубут чэчирии сайдарын туһугар үлэҕин билинэн, үрдүктүк сыаналаан туран, бар дьоҥҥор уонна өрөспүүбүлүкэбитигэр үтүө санааҕар, бэриниилээххэр махтанабыт! Маннык киһи биһиги кэккэбитигэр баарынан киэн туттабыт.
Эн хас бииирдии күнүҥ сырдык, толору иэйиилээх буоллун, тулалыыр эйгэҕэр үтүө сонуннар элбии, олоҕуҥ дьылҕатын кинигэтигэр өссө да үгүс чаҕылхай сирэйдэр эбиллэ турдуннар!
Үлэ – дьол, онон олоҕуҥ инникитин өссө күүстээх кимиилээх, хорутуулаах, хотуулаах, саха устуоруйатыгар чиҥник киирэр киэҥ далааһыннаах үлэни баҕарабыт! Тус бэйэҕэр аламаас таастыы кытаанах доруобуйаны, туохха барытыгар табыллыыны, үүнэ турар үрдүк ситиһиилэри, Эйиэхэ уонна чугас дьоҥҥор үгүс үөрүүлээх, дьоллоох олоҕу баҕарабыт!
Туску!