Бүгүн – Саха Өрөспүүбүлүкэтин күнэ. Бу улуу күҥҥэ ананан араас тэрээһиннэр буолан аастылар. Дьокуускайга үгэс быһыытынан Саха автономиятын туруорсубут, тэрийсибит саарыннарбыт өйдөбүнньүктэригэр сибэкки ууруута, болуоссаттарга араас кэнсиэрдэр, куорат пааркатыгар кэлэксэньиэрдэр дьаарбаҥкалара буоллулар. Ол эрэн, быйыл бу сүдү бырааһынньыкка куорат оскуолаларын үөрэнээччилэригэр уонна сүрүнэ, үрдүк уонна орто үөрэх устудьуоннарыгар анаммыт аралдьытар, көрү-нары көҕүлүүр эрэ буолбакка, оҕолорбутугар уонна ыччаттарбытыгар бу күн суолтатын санатар-өйдөтөр хабааннааах тэрээһиннэр буолбатылар. Хомойуох иһин, куорат уулуссаларыгар, үөрэх-үлэ тэрилтэлэрин дьиэлэригэр Өрөспүүбүлүкэ күнүн туһунан эҕэрдэлиир суруктар, улуу убайдарбыт мөссүөннэрэ көстүбэтилэр. Урукку сылларга маассабай хаамыылар ыытыллаллара, онон киин куорат, улуустар кииннэрин эдэр ыччата, оҕолорбут аҕа көлүөнэ дьонун кытта биир кэккэҕэ хаамсаллара, үөрэх тэрилтэлэригэр биллэр биир дойдулаахтарбытыныын, үлэ-сэрии бэтэрээннэриниин көрсүһүүлэр тэриллэллэрэ – бу буолара дойдубут дьиҥнээх историятыгар кыттыы. Кэлин патриотизмы иитии, дойдубут историятын үөрэтии туһунан элбэхтик этиллэр да, итинник судургу, хас биирдии саха киһитэ бэйэтин баҕатынан кэлэн кыттар тэрээһиннэрэ ыытыллыбат буоллулар. Билигин сибэкки ууруутугар, тыйаатырга буолар үөрүүлээх мунньахтарга бэрт аҕыйах, ыҥырыллыбыт ыалдьыттар эрэ сылдар кыахтаахтар.
Ол эрэн норуоттан тахсар көҕүлээһиннэр өссө да баар буолаллара үөрдэр. Бүгүн сарсыарда Кыайыы болуоссатыгар син балайда элбэх киһи кэлэн, Ачет Иванов алгыһынан арчыланнылар, бэйэлэрин санааларын бөҕөргөттүлэр. Онтон салгыы Арчы дьиэтигэр аҕа табаарыстарыттан, учууталларыттан эстэпиэтэни тутан, “Түмэн” ыччат холбоһугун актыбыыстара бэлиэ күҥҥэ аналлаах тэрээһини эдэр учуутал Сибэкки Заровняева уонна устудьуон Алексей Борисов көрсүһүүнү салайан ыыттылар. Ыччаты тыа сирин үлэтигэр көҕүлүүр блогер Масаха Мэхээс, кырдьаҕас эколог Иван Бурцев, “Ийэ тыл кэскилэ” түмсүү салайааччыта Вилюяна Никитина, көхтөөх уопсастыбанньык Алла Ноговицына, буоксаҕа спорт үтүөлээх маастара Василий Егоров, актыбыыс Владимир Борисов, “Күн” оҕо хамсааһынын салайааччыта Клара Романова, Олоҥхо ыһыаҕын муҥутуур кыайыылааҕа Марфа Аммосова, Дархан Этээччи Денис Оконешников, МГИМО устудьуона Альберт Попов саха тылын дьылҕатын туһунан кэпсэттилэр, бэйэлэрин санааларын үллэһиннилэр. Үөрүүлээх тэрээһин оһуохайынан түмүктэннэ.
Бу күн устата, өссө бэҕэһээҥҥиттэн саҕалаан, куорат уулуссаларыгар Саха Өрөспүүбүлүкэтин былааҕын иилиммит массыына элбээбитэ киһини астыннарар. Ыччаттарбыт, аҕам да саастаах тимир көлө ыытааччылара итинник гынан бэйэлэрин дойдуларыгар тапталларын, бэриниилээхтэрин көрдөрөллөрө үтүө холобур буолуон сөп. Онтон ыкса киэһэ сүүһүнэн массыыналаахтар Үс Хатыҥҥа мустан, онтон куоракка дылы айаннаан иһэр долгутуулаах хаартыскаларын, видеоҕа устуулары социальнай ситимнэргэ көрдүбүт.
Владислав КОРОТОВ суруйуута, хаартыскаҕа түһэриитэ.