Мой лайфхак для тех, кто устал натягивать «Наташу»

Делюсь своим изобретением — ноу-хау от «Пробоксера» со стажем.
У меня портаж (новый, придуманный мною термин вместо банальной «Наташи» — двусоставная аббревиатура ПОРТативный гарАЖ) капитально закреплен под багажником, так что его сборка и накрывание авто занимает 2-3 минуты и требует минимума усилий. Система «Антивор» — не волнуюсь, что кто-либо украдет его. Немаловажное обстоятельство — подобное крепление Портажа обеспечивает безопасную езду, его не сорвет при движении, он не упадет при плохой сборке на лобовое стекло.

Я пользуюсь таким уже десятый сезон. Первый купил в Китае в 2014-м за 7 тысяч.
Собирается за 3-5 минут спокойных, даже вальяжных телодвижений. Машина накрывается за минуту с применением изящных танцевальных па вокруг автомобиля.
Я один собираю-разбираю😃 конечно, не танцы на паркете, но все же больших усилий, какие я прилагал, когда пять зим я собирал и накрывал китайским портажом, сейчас не требуется. Даже запыхаться не успеваю
Такой портаж от «Хотутент» стоил 8000 рублей. С ноября по конец марта активно использую. Езжу на машине каждый день, выезжаю и в районы, где такой портативный гараж незаменим, так как освобождает от необходимости искать каждый раз гараж для ночлега. На работу приезжаю и накрываю. Ночью и днем машина заводится по два раза минут на 20.
Капитальный гараж в Якутске стоит 1,5-2 млн, руб., а аренда обходится в месяц от 10 до 20 тысяч.

https://www.youtube.com/watch?v=bthxssROfZo

Портативнай гарааһы мин 2014 сыл кыһыныттан туттабын. Интернеккэ “Наташа” диэн итинник тэрили туһаналларын ааҕан баран, Кытайга олорор билэр киһибэр сакаастаабытым. Ону Гуанчжоу куораттан булан баран, 2014 сыл ахсынньытыгар миэхэ ыыппыта. Онтон ыла онус кыһыммын туһанабын, бу тэрил пионера буолабын диэтэхпинэ туох да омуна суох буолуо.

Портативнай гарааһынан массыынаҕын бүрүйэн баран, автосигнализацияҕын температуранан собуоттанар гына туруоран кэбиһэҕин. Уонна туох да кыһалҕата суох сылдьаҕын. -40 кыраадыска массыына түүн иккитэ, күнүс үлэҕэр тиийэн бүрүйэн кэбистэххинэ, эмиэ иккитэ собуоттанар, онтон -50 буоллаҕына – үстүүтэ. Собуоттанан баран, мотуора сылыйдаҕына, бэйэтэ арахсан хаалар. Бастаан сигналкам брелогун сиэппэр укта сылдьан, алҕас кнопкатын баттаан, автозапуһу арааран кэбиһэр түбэлтэлэр бааллара. Онтон бу кэнники иккис массыынабар А93 сигализация атыылаһан, собуоттанарын -9 кыраадыска туруоттаран, туох да эрэйи көрсүбэппин.

Мин “Пробокс” массыыналаахпын, онон аан бастаан кэнники багажникка укта сылдьыбытым. Ол эрээри, оннук туһаныы кэккэ мэһэйдэрдээх этэ. Күн аайы гаражкын хомуйан баран, багажникка угар сыанан аҕаабат. Кыһын ортото конденсат мустан, гарааһыҥ ыйааһына лаппа ыарыыр, аны выхлоп сыта иҥэн, салон иһэ гаас сыттанар.

Оннук сылдьан, хайдах массыына үрдүгэр куруук сылдьар гына иҥиннэрэр туһунан толкуйдаан тахсарым. Онтон, интернеккэ ХИФУ автодорожнай факультетыгар бэйэлэрэ айан оҥорбут багажниктарын атыылыылларын ааҕан, кинилэргэ тиийбитим. Онтум квадратнай профилынан сваркалаан, уонтан тахса киилэлээх тимир багажник эбит. Гарааһы угарга анаан кыараҕас баҕайы миэстэни көрбүттэр, ону конденсата тоҥон, үллэн хаалбыт сабыыны угарга наһаа ыарахан этэ. Саас тыаҕа тахсаары трассаҕа айаннаан истэхпинэ, ол багажнигым иҥиннэриитэ босхо баран, крышаттан сууллан түһэн, хата массыынабын алдьаппатаҕар баһыыба.

Ол иһин наар массыына  штатнай багажнигар иҥиннэрэр туһунан толкуйдуур этим. Онтон бастакы “Пробоксум” уон сыл сүүрэн баран алдьаммытын кэннэ, саҥа “Пробоксы” анаан штатнай багажниктааҕы атыыласпытым. Уонна дьэ бэйэм баҕа санаабын толорбутум.

Бастакы кытайым гарааһа эргэрэн, күн уота сиэн эмэхсийбитэ. Ол иһин “Хотутент” тэрилтэ портативнай гарааһын 8000 солкуобайга атыыласпытым. Саҥа А93 сигнализацияны туруоруммутум, 14 тыһыынчаҕа.  Ороскуотум итинэн бүттэ. 2019 сылтан төрдүс кыһынын туох да кыһалҕата суох кыстыыбын, уопсайа – тохсус сылым буолла.

“Хотутеммын” багажник анныгар капитальнайдык иҥиннэрэн кэбистим. Иннигэр пластик турубаны багажникка иҥиннэрэн баран, онно багажнай сиэккэни баайдым. Тентэбин хомуйан баран, ол сиэккэбинэн үрдүттэн сабан баран, кэннигэр эмиэ оннук турба баалла сылдьарынан иҥиннэрэн кэбиһэбин. Ыраах айанныырбар, кэнники турбабын эмиэ багажнай эрэһииҥкэнэн туттаран кэбиһэбин.

Маннык портативнай гараж бары өттүнэн барыыстаах. Бастатан туран, капитальнай гараж наадата суох. Билигин таас гараж дьиэ сыанатыттан арыый кыра, куортамныыр буоллахха – ыйга 15-20 тыһыынча төлүөххэ наада. Онтон мин бастакы гаражпын 11 тыһыынчаҕа ылан баран, биэс сыл туһаммытым.

Аны туран, таас гаражтаах дьон массыналарын сылааска хоннорон баран, үлэлэригэр кэлэн уһун кыһыны быһа умуруорбакка үлэлэтэ турарга күһэллэллэр. Мантыҥ бензиҥҥэр улахан ороскуоттаах, ону таһынан айылҕаҕа буортутун туһунан этэ да барыллыбат. Өссө ол турар кэмигэр мотуора эрэ сылыйар, ходовката тигинэччи тоҥон хаалар. Көлүөһэтэ эмиэ тоҥон, “квадратнай” буолар, ол эрэһиинэҥ туһаныллар болдьоҕун биллэ кылгатар. Онтон портативнай гарааһынан сабыллыбыт массыына төгүрүк суукканы быһа комфортнай усулуобуйаҕа, сөптөөх сылааска турар, ханнык да чааһа дөйө тоҥон хаалбат. Айанныырыгар эрэ тоҥор, ону хайыыр да кыах суох.

Билигин мин “Хотутеммин” уоруохтара диэн долгуйбаппын. Бпгажник анныгар олордуллубут буолан, ким да устан илдьэ бара кыаҕа суох, арай багажнигы өһүлэн ыллахтарына эрэ. Ол түгэҥҥэ сигнализация тыаһаан, уоруйаҕы үргүтүөн сөп. Урут бастакы порт.гаражпын анныгар аналлаах тимир “кулгаахтары” олордон, онон тимир сыабынан төгүрүччү иилээн баран, күлүүһүнэн хатаан кэбиһэр этим.

Онтон билигин туох да кыһалҕа суох. Дьиэбэр олорон, тахсыам 10-15 мүнүүтэ иннинэ дистанционканан собуоттуубун, тахсан 2-3 мүнүүтэ гараажпын хомуйан иҥиннэрэн баран, сылаас массыынаҕа олорон айанныыбын.  Улуустарга бардахпына турар, хонор гараж көрдүү сатаабаппын. Тыаҕа бултуу, сынньана тахсарга туох да эрэйэ суох.

Массыынам кыра буолан, 2000 солкуобайга АИ-95 бензини 35 лиитэрэни куттарым, -40 кыраадыска уон хонукка тиийэр, -50 кыраадыска – биир нэдиэлэ айанныыбын. Онон ыйга 6000-8000 солкуобайы бензиҥҥэ ороскуоттуубун. Гараж төлөбүрүгэр төбөм ыалдьыбат.

Онон бу портативнай гараж диэн тэрили олус биһирээтим. Мин санаабар, Саха сиригэр бары өттүнэн табыгастаах, барыыстаах уонна эргиччи туһалаах оҥоһук.

Поделиться: