Поэт доҕорум бэлэҕин 52 сыл харыстаан илдьэ сылдьабын

Кулун тутар 1 күнүгэр биир дойдулааҕым, “Уоттаах түүҥҥү Дьокуускай” уонна «Үчүгэй да этэ ол сайын» дьиҥ чахчы норуот ырыалара буолбут хоһооннору суруйбут Альберт Бүлүүйүскэй төрөөбүтэ 80 сыла буолла.

Мин Альберы кытта 1970 сыллаахха билсибитим, ол саҕана республикаҕа киэҥник биллэр “дьиҥнээх” поэты кытта доҕордоһон сүрдээҕин астына сылдьыбыт кэмнэрдээҕим. Онтон кэлин Тойбохойго оҕо дьиэтигэр үлэлии сылдьан, Алик онно иитиллэ сылдьыбытын билбитим.

Билиин кини хоһооннорун уонна бэйэтин туһунан ахтыы кинигэлэрин кыра библиотечкатын ууруна сылдьабын. Ону таһынан, Альберт мин кинигэни сөбүлүүрбүн таба көрөн, миэхэ таптыыр-ытыктыыр поэтын Сергей Есенин кыра кээмэйдээх хомуурунньугун илии баттаан бэлэхтээбитэ. Ол саҕана улуу нуучча поэтын хоһоонноругар ырыалар саҥардыы тарҕанан эрэллэрэ, ыччаттар гитараҕа доҕуһуоллатан, кини таптал туһунан айымньыларынан суруллубут ырыалары бэркэ сөбүлүүрбүт, түмсэ тустэхпитинэ дуоһуйа ыллыырбыт.

Ол кэмтэн бэлиэр 50-тан тахса сыл ааста да, Алик бэлэҕин харайан, сүтэрбэккэ илдьэ сылдьабын. Ити кэм устата студеннаан, онтон Ленинград куоракка олорон-үлэлээн, түөрт оройуоҥҥа учууталлаан, Дьокуускайга хаста да төхтүрүйэн олохсуйа сатаан – бэйэм ааҕарбынан 40-тан тахсата көспүт сылларбар доҕорум Альберт кинигэтэ миигин кытта сылдьыста. Урут улаханнык көнньүөрдэхпинэ, эбэтэр төттөрүтүн санаам түстэҕинэ, бу кинигэни ылан улуу Есенин ырыаларын ыллааччыбын, уонна булгуччу Альберт Семенович булгуруйбат санаата бөҕөтүн, кэрэни кэрэхсиирин, олоххо дьулуурун санаан кэлэбин.

Бу кинигэни арыйан ааҕа олорон, Альберт Бүлүүйүскэй айар үлэтигэр туһаммытын, кини сорох сөбүлүүр, иэйиитин көҕүлүүр хоһоонноругар илиитинэн бэлиэлэри суруйбутун өйдөөн көрөбүн. Сорох бэйэтигэр чугас хоһооннору көннөрү бэлиэтээбит, сорохторугар строка сүһүөҕүн ааҕан, хоһоон поэтическай кээмэйин суоттаабыт-аахпыт. Бу бэлиэлэри көрөн, саха лирикатын биир бастыҥ ырыаһытын айар хоһун аанын сэгэтэн көрбүт курдук сананным.

Владислав КОРОТОВ.

Поделиться: